Злазіць ці не злазіць?

 З 1 верасня 2025 г. праз 10 год з таго часу, як я падымаў тэму веладарожак, пачалі дзейнічаць новыя правілы дарожнага руху (ПДР), якія сярод іншага значна змянілі ўмовы для власіпедыстаў і самакатчыкаў. Доўгі час ім можна было не спешвацца на ўсіх пешаходных пераходах і велапераездах, але новыя ПДР значна скарацілі такую магчымасць.

Цяпер не злазіць з жалезных коней можна толькі там, дзе ёсць спецыяльны светлафор з выявай веласіпеда (не блытаць з пешаходным светлафорам, пад якім вісіць таблічка з чорным веласіпедам на белым фоне, цяпер гэта таблічка не дае права не спешвацца!), або на скрыжаванні па велапераездзе не далей за 1 м ад правага краю праезнай часткі, або па лініі тратуараў і ўзбочын, саступаючы іншым транспартным сродкам дарогу (п. 150 ПДР 2025 г.).

Першыя адчуванні

Як раз 1 верасня мне давялося ездзіць на работу на веласіпедзе і дарога, якая займала каля 30 хвілін раней, з усімі спешваннямі займала ў паўтары разы больш часу.

На маім шляху быў толькі адзін веласветлафор, што дазваляла мне не злазіць толькі раз за ўсю дарогу. (Пазней гэты светлафор знялі).

Акрамя мяне, у гэты дзень спешваліся толькі пару веласіпедыстаў на маім шляху.

Першыя дні верасня сацыяльныя сеткі бурлілі спрэчкамі наконт справядлівасці і мудрасці новаўвядзенняў на дарозе. Да гонару ДАІ парушальнікам п.150 у першыя дні рабілі толькі папярэджанні і тлумачэнні, разумеючы, што адаптавацца да новых правілаў можа быць цяжка.

Саламонава рашэнне

Каб не ствараць больш праблем для кіроўцаў на пешаходных пераходах ДАІ вырашыла павялічыць колькасць веласветлафораў на вуліцах Мінска.

Часцей за ўсё проста вешалі такі фанерны светлафор пад пешаходны (як гэты на развязцы Філімонава-Незалежнасці), што дазволіла веласіпедыстам і самакатчыкам не злазіць з жалезных коней на велапераездзе.

Веласветлафоры паставілі на шырокіх дарогах, як тут насупраць Нацыянальнай бібліятэкі. Праўда, на момант здымка веласветлафор "завіс" на жоўтым колеры :)

У другой палове верасня веласіпедыстаў і самакатчыкаў, якія спешваюцца па новых правілах стала значна больш, а наяўнасць двух рэгулюемых пераездаў праз самыя шырокія дарогі на маім шляху на работу кампенсуе неабходнасць спешывацца ў многіх іншых месцах.

Цікава будзе пагядзець праз час ці дапамогуць змены ў ПДР зрабіць жыццё пешаходаў, веласіпедыстаў і кіроўцаў бяспечней...

П.С. Новыя правілы таксама робяць некаторыя самакаты з сродкаў персанальнай мабільнасці электрамапеды, якія маюць быць зарэгістраваны ў ДАІ, на іх патрэбна пасведчанне кіроўцы і яны павінны рухацца па праезнай частцы. Я тут не ў такой ступені ў тэме, каб дзяліцца ўражаннямі, але пакуль не бачыў такія самакаты на праезных частках і не сустракаў тых, каму прыходзіцца рэгістраваць свайго каня...

Гл. таксама

Беларусь за стырном

Першы ровар-2023 вачыма бацькі і сына

Вуліцы Мінска, назвы якіх звязаны не з тым, што многія думаюць. Частка 2

 Тэма вуліц з назвамі, паходжанне якіх не ўсе разумеюць атрымала працяг у маім блогу. У папярэднім пасце аб гэтым я пісаў толькі пра асобныя вуліцы. У гэтым гаворка пойдзе пра комплекс: вуліца-завулак-праезд.

Жукоўскага

Тапонім звязаны не з вядомым рускім літаратарам Васілём Жукоўскім, а з бацькам аэрадынамікі Мікалаем Жукоўскім. Праўда, для мясцовых "чоткіх пацаноў" 2-й паловы ХХ ст. раён вуліцы, завулка і праезда быў вядомы як "Жучка", альтэрнатыўная назва -- "Шалман".

Від на ўсю вуліцу Жукоўскага з узгорка на скрыжаванні "Жучкі" з Магілёўскай вуліцай. На даляглядзе месца дзе за Аэрадромнай пачынаецца квартал "Мінск-Свет" з яго хмарачосамі.

Мурал "Мінск-Масква" на рагу вуліц Магілёўскай і Жукоўскага.

Дамы 1 і 3

Дом 2

На цотным баку вуліцы Жукоўскага на адрэзку ад Магілёўскай да Варанянскага усталяваны такія таблічкі забароны выгулу сабак. Гэта таблічка -- адзіная, дзе штосьці захавалася.

Дом 4

Кантэйнер старога тыпу для сбора шкла. Зараз такія рэдка выкарыстоўваюцца.

Фігурныя сцены дома 4 крыху нагадваюць формы старога замка. Такія будавалі ў 90-я і 2000-я гг., як і гэты дом.

На вуліцы Жукоўскага, як і на маім родным Усходзе-1, ёсць алея крэатыўных лавачак.

Дом 5/1

Дом 6/2. На фото патрапілі 3 элементы 2020-х гг., якія распаўсюджваюцца па Мінску: кікшэрынгавы самакат, паштамат самаабслугоўвання і пункт выдачы "Азона".

Бібліятэка ў доме 9/1 лічыцца настолькі значным аб'ектам, што ў яе гонар назвалі прыпынак грамадскага транспарту. Дарэчы, гэта адзін з рэдкіх аб'ектаў вуліцы з назвай на беларускай мове. Яшчэ адзін цікавы факт: у гэтым доме 2 бібліятэкі -- №20 і №4 (дзіцячая).

Дом 9/1

Дом 8/1.

Кандыцыянеры на гэтым доме выглядаюць як мініяцюрныя балкончыкі :)

Яшчэ крэатыўныя лавачкі ля прыпынку грамадскага транспарту...

Пешаходная і веласіпедная дарожкі ля дома 10/1  акупаваныя галубамі...

Дом 10/1

Бізнес-цэнтр (д.11А) пабудаваны ў 2010-х гг.,  і д. 9/1.

Каля скрыжавання з вуліцай Варанянскага знаходзіцца рэшта крэатыўных лавачак.

Паветраводы станцыі метро "Кавальская слабада"

Мурал у гонар Кастрычніцкага раёна Мінска на стыку дамоў 17 і 19.

Выгляд вуліцы ў раёне станцыі метро. Фоткі самой станцыі можна знайсці тут.

За дрэвамі і паркоўкай хаваецца праезд Жукоўскага

Фактычна, гэты дом, які выглядае недагледжаным, знаходзіцца на рагу вуліцы Жукоўскага і аднайменнага праезду.

Частка праезду Жукоўскага выглядае закінутым...

А частка, што бліжэй да скрыжавання з 1-м завулкам Жукоўскага, яшчэ жыве.

Рэспект гаспадарам дому за пазначэнне праезду на беларускай мове!

1-ы завулак Жукоўскага глядзіць у будучыню крыху больш упэўнена, чым яго цёзка-праезд...

Цікава: няма другога ці трэцяга завулка Жукоўскага, але першы завулак імя гэтага вучонага так і не згубіў свой нумар...

Крыху прагулкі па "першаму завулку".

1-ы завулак Жукоўскага сканчаецца перасячэннем з Быхаўскай вуліцай. Дом 55 па Быхаўскай жыве бо гэта офісны будынак...

... а дамы 59 і 61, што ідуць у бок скрыжавання з вуліцай Жукоўскага, дажываюць свой час, каб саступіць месца новай гарадской інфраструктуры.

Скрыжаванне вуліц Быхаўскай і Жукоўскага. Дарэчы, у мінулым годзе здымаў Быхаўскую ў раёне вуліцы Авакяна.

З боку вуліцы Жукоўскага прыватны сектар паміж Быхаўскай і праездам Жукоўскага выглядае закінутым

Сучасны дом 16 па вуліцы Жукоўскага цягнецца ад Быхаўскай да Сенніцкай.

Вуліца Жукоўскага, 14, паркінг, пабудаваны ў 2024 г. паміж Быхаўскай і Сенніцкай. Дарэчы, раней домам 14 была спецшкола № 18 для дзяцей з парушэннямі мовы і яна стаяла каля скрыжавання з вул. Варанянскага.

Від на Мінск-Свет на даляглядзе...

Паркінг яшчэ толькі пачаў абжывацца

Тут дом 16 выходзіць на Сенніцкую вуліцу

А на другім баку вуліцы Жукоўскага яшчэ адзін пакуль цэлы сектар сядзібнай забудовы.

Від на Сенніцкую з Жукоўскага

Мінск стары і новы па два бакі Сенніцкай :)

Вяртаюся ў бок станцыі метро і фатаграфую няцотны бок "Жучкі". Дом на фота таксама адносіцца да Сенніцкай вуліцы, бо яна дзвюма лініямі ўваходзіць ў Жукоўскага ў двух розных месцах.

Завяршае летнюю вандроўку па Жукоўскіх мясцінах вось такі кампактны паветравод метрапалітэна. 

Калі не пазначана інакш, фотаграфіі зроблены А. Берастоўскім 22.08.2025 г. Працяг будзе