Раздзельны збор смецця. Як гэта бывае ў жыцці.

Калі я пісаў пра макулатуру некалькі год таму, я яшчэ не думаў сур'ёзна, што буду займацца раздзельным зборам смецця ў сваім доме. Але вось ужо некалькі месяцаў, як мы стабільна раскладаем смецце па пакетах амаль як тут:

Праблемы раздзельнага збору

1. Лянота. Бывае цяжка кінуць асобна пластыкавы пакетык ці паперку.
2. Нязручнасць. Раней вядро для смецця, куды мы зараз кідаем арганіку, займала менш месца і вакол была прастора для іншых гаспадарчых рэчаў. Цяпер да вядра дадаліся асобныя пакеты пад паперу і пластык.
3. Магчымы даўжэйшы прастой арганічнага смецця. Калі мы ўсё кідалі "да кучы", то звычайна выносілі смецце кожны дзень. Цяпер вядро з арганікай можа стаяць і каля двух дзён.
4. Адносная эфектыўнасць. Калі нехта кідае ў грамадскую сметніцу пад пластык шкло ды арганіку, то потым цяжка сартыраваць смецце на перапрацоўку. Таксама ёсць праблема ўплаўлення паперы ў пластык на многіх магазінных бутэльках. Мы кідаем іх у сметніцу пад пластык, але там ёсць і папера, і переапрацаваць такое смецце вельмі праблематычна. Я ўжо маўчу пра тое, што пластык пластыку не роўны: яны могуць быць абсалютна розных відаў, як і металалом.

Назіранні

Заўважыў, што часцей за ўсё першым напаўняецца пакет пад пластык. Потым ідзе арганічна-пабытовае смецце. За ім напаўняецца папера. Шкло мы звычайна не збіраем асобна. Але час ад часу выносім непатрэбную бутэльку ці слоік. А вось метал у нашым мікрараёне нават няма куды кідаць асобна. Праўда ў некаторых магазінах ёсць сметніцы для старых батарэяк.

А вы збіраеце асобна?

P.S. На сярэдзіну лістапада 2021 г. у мяне з'явіліся новыя назіранні.

* Людзі па-ранейшаму рэдка збіраюць смецце асобна: у кантэйнер пад пластык кідаюць і паперу, і арганічнае смецце.

* На кантэйнеры можа быць пазначана, маўляў, "пластык", а туды кідаюць звычайныя адходы.

* У нашым мікрараёне Усход-1 шмат кантэйнераў пад пластык, хапае кантэйнераў пад паперу, у тым ліку і макулатурных, як на фота вышэй з гэтага паста, але амаль няма кантэйнераў пад шкло.

* У канцы 2020 г. у нашым мікрараёне паставілі такую канструкцыю пад раздзельны збор смецця. Не прайшло і года, як цэклік пад збор "шкла" зламалі, а многія сценкі з легкага металу выбілі ці пагнулі вандалы. Нават фоткаць розніцу не хочацца...

P.P.S. У 2024 г. у Мінску змянілі правілы збору смецця. Цяпер пластык, шкло і паперу не збіраюць у асобныя кантэйнеры, а кладуць у кантэйнер для другасных матэрыяльных рэсурсаў, як гэты каля станцыі метро "Пушкінская":

Часткова гэта звязана з тым, што многія мінчане кідалі смецце не сартыруючы яго ва ўсе кантэйнеры. Другасныя рэсуры працягнуць сартыраваць на месцы, куды іх вывозяць.