Раней і цяпер: у імгненні кадраў

 У мінулым паведамленні на гэту тэму я імкнуўся распавесці гісторыю кожнага аб'екта ці даць яму апісанне. У гэтым будзе пра перамены у маштабе імгненнасці (было-цяпер) з мінімумам апісанняў.

Калі ў 2022 г. я фоткаў "Грушаўскі пасад", мне здавалася, што ў кадр патрапіў прыгожы від будоўлі дома ў працэсе: злева яшчэ будуецца, пасярэдзіне дэкаруецца, а справа - ўсё гатова. І толькі потым я даведаўся, што гэта адзін са сталічных доўгабудаў, які толькі нядаўна зноў пачалі дабудоўваць.

Стэла ў ваенным гарадку Печы на маіх фота ў 2013 г. і ў 2015 г. Калі барацьба з бел-чырвона-белай сімволікай яшчэ не была "мейнстрымам" у Беларусі, чырвоную паласу на стэле ў ваенным гарадку замянілі цёмна-зялёнай. Ёсць інфармацыя, што пэўныя пенсіянеры ўбачылі ў гэтым крамолу, хоць сама стэла была пастаўлена яшчэ у савецкі час.

На Маскоўскай вуліцы ў Мінску захаваўся след надпісу "Добры друк" па-над аркай аднаго з дамоў на цотным баку бліжэй да маста, які звязвае гэту вуліцу з праспектам Незалежнасці.

А пад самім мастом паміж пр. Незалежнасці і вул. Маскоўскай быў мурал "Імгненнасць", які мне пашанцавала сфоткаць за некалькі месяцаў да поўнай ліквідацыі. Цяпер там бардова-карычневая сцяна.

Яшчэ прыклад з серыі "няма таго, што раньш было" знішчаныя надпісы беларускай ліцінкай на вуліцах Мінска. На фота: прыпынак "Чырвоная" ў маі і лістападзе 2023 г.

Ад санітайзера з антысептыкам, усталяванага ў "Дана Моле" вясной 2020 г. падчас пандэміі, засталіся дзіркі ў сцяне. З аднаго боку, пандэмія відавочна скончылася, з другога, хіба гэта раскоша мець магчымасць апрацаваць рукі антысептыкам у публічным месцы і варта вярнуцца да часоў, калі ў грамадскіх туалетах не было туалетнай паперы? Дарэчы, раней я сабраў падборку падобных слядоў ад таксафонаў :)

Магазін на вул. Каліноўскага 72 ў Мінску дзейнічаў пад рознымі назвамі: у 90-х гэта была "Закрама" з націскам на 2-і склад, потым "Багатая хата" ў першай палове дзясятых (тады і патрапіў пад мой аб'ектыў для паста пра беларускамоўныя цэтлікі), потым "Рублёўскі" і адпаведна "Санта" і ў цяперашнім дзясяцігоддзі "Суседзі". На рагу дома таксама мацаванні пад сцягі, але практыка трымаць дзяржаўны сцяг на магазінах пастаянна з'явілася толькі ў 2021 г.

Магчымы працяг тэмы

Другое жыццё мінскіх будынкаў