Гарачае лета 2023-га

 

Лета 2023 г стала фенаменальна гарачым. Наколькі мне вядома рэкорд 2010 г., калі тэрмометр у Беларусі дасягаў +38 С, у гэтым годзе не паўтарыўся, але былі неаднаразовыя рэкорды ў канкрэтныя дні да +34 С. Увогуле не толькі ў Беларусі, але па ўсёй планеце лета было прызнана рэкордна спякотным.

У адзін з такіх спякотных дзён (прыкладна +33 С) я з дзецьмі правёў самы гарачы час на вуліцах Салігорска. Адчуванне было як у Крыму, Затоцы ці Адэсе ў мінулыя часы...

Падчас засухі ў сярэдзіне чэрвеня машыны, якія паліваюць дарогі, выкарыстоўваліся для паліўкі газонаў. Фота А. Берастоўскага

Спякота чарагавалася з залевай, якая часам была штармавой, як ў тропіках. Відэа А. Берастоўскага. Ліпень 2023 г.

Некаторы час таму я выражаў свае сумневы ў тым, што глабальнае пацяпленне -- навуковы факт. Нават калі пісаў пра анамаліі надвор'я і здымаў відэа, заставаўся скептыкам. У апошнія гады прыходжу да высновы, што глабальнае пацяпленне сапраўды ідзе і змяняе клімат Беларусі. Праз некаторы час гэта можа правесці да немагчымасці льнагадоўлі, якая з'яўляецца адным з сімвалаў нашай культуры. Але, з другога боку, расціць кавуны і вінаград стала лягчэй, а ўраджай кукурузы з'яўляецца раней. Мой сябар, які жыве за горадам, казаў, што раней спускаў свой надзіманы басейн у двары каля 15 жніўня, а цяпер купаецца нават у пачатку восені.

Яшчэ гэтым летам незвычайна актывізаваліся восы. Нажаль ад іх джалаў нават загінулі некалькі чалавек...

Неяк я пажартаваў, што месяц снежань варта пераназваць у хлюпень. Не згаворваючыся са мной паэт Уладзімір Сцяпан назваў зімовыя месяцы: "бясснежань", "прастудзень" і "саплюты".

Пажывем-пабачым што будзе далей, але гэта лета ўжо стала часткай гісторыі.

***

Здалося, што лета 2023 года скончылася 14 верасня, калі летняя навальніца перайшла ў звычайны асенні дождж і не ўсе мінчане зразумелі, што без парасона і курткі цяпер з дому лепш не выходзіць. Але потым зноў вярнулася летняе надвор'е, якое працягнула чарадавацца з асеннім. Некаторыя нават працягнулі збіраць трускалкі на дачах. Толькі з надыходам кастрычніка ўсталявалася сапраўды асенняе надвор'е. Прычым 7 кастрычніка пайшоў мокры снег.

Гл. таксама:

Сонечнае зацьменне

Наступствы ўрагану ў 2016 г. і мае разважанні аб зменах клімата ў 2021 г.

Зіма 2023-2024 была незвычайнай